MUUGUZI AUA WAGONJWA 30 KISA 'KUBOREKA'

 


Mahakama ya Ujerumani imeambiwa aliyekuwa muuguzi wa kiume amekiri kuua zaidi ya wagongwa 30 kwenye hospitali alipokuwa akifanyia kazi, kwa madai kuwa ‘kaboreka tu’.

Mtaalamu wa magonjwa ya akili alisema wakati wa kesi hiyo kuwa muuguzi huyo mwenye umri wa miaka 38 alikiri kufanya mauaji hayo katika uchunguzi aliofanyiwa hivi karibuni, msemaji wa mahakama alisema.

Kesi ya aliyekuwa muuguzi huyo ilianza Oldenburg,  kaskazini mwa Ujerumani mwezi Septemba, akituhumiwa kwa mauaji ya wagonjwa watatu na jaribio la mauaji ya wengine wawili.

Mtaalamu huyo alisema alikiri mashtaka hayo, na pia akasema alizidisha kipimo cha dawa kwa wagonjwa wengine 90, ambapo 30 walifariki dunia, msemaji huyo alisema.

Wachunguzi wanahisi nia yake ilikuwa kuibua dharura za kitabibu ili apate nafasi ya kuonyesha ujuzi wake wa kumwibua mgonjwa aliyezimia, lakini pia alikuwa ‘ameboreka tu’.

Inaaminiwa alikuwa akiwachoma wagonjwa na sindano yenye dawa ya kutibu moyo iliyovuruga mapigo ya moyo na kushusha kiwango cha damu.

Chanzo: AP

SHAHIDI WA ICC KENYA 'AHUSISHWA NA UFISADI'

Mtu mmoja aliyekutwa amekufa Kenya aliyehusishwa na kesi ya Naibu Rais William Ruto alikutwa katika majaribio ya kuwahonga mashahidi, Mahakama ya Kimataifa ya Uhalifu wa Kivita ICC ilisema.

Waendesha mashtaka walisema hawakupanga kumwita, Meshack Yebei, kama shahidi kwasababu hiyo.

Mwili wa Bw Yebei ulikutwa magharibi mwa Kenya mapema mwezi huu.

Wakili wake alisema angetakiwa kuwa shahidi wa Bw Ruto, anayekana mashtaka ya uhalifu dhidi ya binadamu.

Bw Ruto alishtakiwa kwa ghasia zilizoibuka baada ya uchaguzi wa mwaka 2007 nchini Kenya.

Ni miongoni mwa maafisa waandamizi wa serikali kushtakiwa na mahakama iliyopo The Hague tangu ianzishwe zaidi ya muongo mmoja uliopita.

ICC ilifuta mashtaka kama hayo dhidi ya Rais Uhuru Kenyatta mwezi uliopita, akidai mashahidi wa upande wa mashtaka wamekuwa wakitishwa na kubadilisha ushahidi wao.

Bw Kenyatta alisema hakuwa na hatia na pia upande wa mashtaka hawakuwa na kesi dhidi yake.


Chanzo: BBC
Imetafsiriwa na Mwandishi wetu

KIONGOZI WA DINI ABU HAMZA AFUNGWA MAISHA

 

Kiongozi wa kiislamu mwenye msimamo mkali Abu Hamza al-Masri amehukumiwa kifungo cha maisha gerezani na mahakama mjini New York kwa kuunga mkono ugaidi.

Alitiwa hatiani mwezi Mei kwa makosa mengi, ikiwemo utekajinyara na jaribio la kuunda kambi ya mafunzo ya kigaidi Marekani.

Kesi yake ilihusisha mchakato mrefu wa kuhamishwa kutoka Uingereza.

Wakati wa kutolewa hukumu, mawakili walimwomba jaji azingatie kuwa amepoteza mikono yake na jicho lake.

Pia walisema mpango wa kumfunga  Abu Hamza katika gereza kubwa la huko Colorado utakiuka ahadi Marekani iliwapa majaji wa London kumhamisha mwaka 2012.

Waendesha mashtaka siku ya Ijumaa walisema serikali ya Marekani haikuwahi kuweka ahadi kama hiyo kwa Uingereza na kifungo cha maisha ndio njia pekee.

MTOTO WA JACKIE CHAN AFUNGWA JELA

Jaycee Chan, mtoto wa kiume wa muigizaji nyota Jackie Chan, amefungwa jela miezi sita kwa kosa linalohusiana na dawa za kulevya.

Chan, mwenye umri wa miaka 32, alikiri kosa kwenye mahakama ya wilaya ya Dongcheng, Beijing kwa “kuhifadhi watu wengine kutumia dawa za kulevya.”

Polisi walivamia nyumbani kwake mwezi Agosti na kukuta zaidi ya gramu 100 za marijuana.

Alikabiliwa na kifungo cha miaka mitatu.

Kukamatwa kwake kulifanyika wakati wa msako mkali wa dawa za kulevya China ambapo watu maarufu kadhaa walijikuta wakikamatwa.

Juni 2014, Rais Xi Jinping walimwamuru polisi kutumia hatua kali kuzuia matumizi ya dawa za kulevya.

Kukiri kwa mtoto wa mmoja wa waigizaji maarufu China kunatoa ujumbe muhimu kutoka serikali ya China: hakuna mwenye kinga ya kukamatwa inapokuja suala la dawa za kulevya.

YAYA TOURE: MCHEZAJI BORA AFRIKA

Kiungo wa Manchester City Yaya Toure amekuwa mchezaji wa kwanza kutajwa kuwa mshindi wa tuzo ya CAF  wa mchezaji bora wa Afrika kwa miaka minne mfululizo.

Toure, mwenye umri wa miaka 31, alitajwa kuwania tuzo hiyo baada ya kuchangia kwa kiasi kikubwa kushinda Ligi Kuu ya England na Kombe la Ligi.

Pia aliisaidia Ivory Coast kufuzu kucheza kwa Kombe la Mataifa ya Afrika 2015.

Toure ameweza kuwashinda mshambuliaji wa Gabon Pierre-Emerick Aubameyang na mlinda mlango wa Nigeria Vincent Enyeama.

Kiungo Toure alitajwa miongoni mwa wachezaji wa kuwania tuzo ya Ballon D’Or  2014 ya Fifa mwezi Oktoba.

VIONGOZI WA DINI YA KIISLAM 'WATOWEKA' UGANDA

Viongozi wanne wa Kiislamu katika mji mkuu wa Uganda, Kampala wametoweka baada ya kuchukuliwa na watu wasioweza kutambuliwa, kiongozi wa jumuiya alisema.

Mkuu wa kundi la Kiiislamu la Tabliq aliiambia BBC “walitekwa” kutoka nyumbani kwao au sehemu za kazi.

Polisi bado hawajaanza kufanya uchunguzi kwani bado haijaripotiwa rasmi kuwa wametoweka, msemaji aliiambia BBC.

Haiko wazi kama kutoweka kwao kuna uhusiano na kupigwa risasi kwa viongozi wawili wa Kiislamu mwezi Desemba.

Mmoja alikuwa mkuu wa jumuiya ya Kishia ya Uganda, ambaye alipigwa risasi mashariki mwa Uganda na watu walio kwenye pikipiki Desemba 25, mwengine alikuwa kiongozi wa Tabliq aliyepigwa risasi kwenye gari lake Desemba 28 mjini Kampala.

Polisi wamenyooshea kidole mauaji hayo kwa waliobaki katika kundi la Allied Democratic Forces (ADF), kundi la waasi la Uganda lenye makao yake makuu nchi jirani ya Jamhuri ya Kidemokrasia ya Congo.

Kundi hilo linaongozwa na Jamil Mukulu, ambaye kabla ya kuanza vuguvugu hilo, alikuwa kiongozi mwenye msimamo mkali ndani ya kundi la Tabliq katika miaka ya 90.

Mwandishi wa BBC alisema kumekuwa na mgongano wa uongozi ndani ya jumuiya ya Tabliq.

Viongozi wa Tabliq ambao hawajulikani walipo:

Yusuf Kakande, Siraj Kawooya , Twaha Ssekitto na Abdul Salam Sekayengo

Viongozi waliouawa mwezi Desemba:

Abdu Kadir Muwaya, kiongozi wa Kishia – aliipinga ADF
Sheikh Mustafa Bahiga, kiongozi wa Tabliq – aliyekuwa polisi na kuhusishwa katika mzozo wa uongozi ndani ya kundi hilo.

KENGE 140 WANASWA WAKITOROSHWA NJE YA NCHI

Uwanja wa Ndege wa Kimataifa wa Mwl Julius Nyerere

Jeshi la Polisi la   Uwanja wa Ndege wa Kimataifa wa Julius Nyerere (JNIA)linamshikilia raia wa Kuwait kwa tuhuma za kukutwa na viumbe hai aina ya Kenge 149 wenye thamani ya Sh 6.3 milioni.

Kamanda wa Polisi wa JNIA, Khamis Suleiman alimtaja mtuhumiwa huyo kuwa ni Hussain Ahmed Ally Mansour(34), raia wa Kuwait ambaye alikamatwa uwanjani hapo jana  majira ya saa 5 usiku wakati akijiandaa  na safari ya  kuelekea nchini Kuwait  kupitia Dubai  na Shirika la Ndege la Emirates  .

Kamanda  Selemani alisema Mansour alikamatwa na wanyama hao ambao aliwahifadhi  kwenye mifuko midogo midogo ilivyowekwa katika begi kubwa lenye rangi nyeusi.

“Kenge waliwekwa kwenye mifuko midogo midogo 15 na kila mmoja kuna kenge 15 na mifuko mingine walikaa wawili,”alisema kamanda Selemani.

Alisema kati ya Kenge hao, 15 walikufa na walio hai walikuwa 134 ambao  walikuwa wamefichwa kwenye mifuko hiyo.