KENYA KUPEWA MKOPO WA DOLA MILIONI 700

 

Shirika la Fedha duniani IMF  limekubali kutoa mkopo wa takriban dola milioni 700 nchini  Kenya.

Fedha hizo zitatumika kama sera ya bima kujilinda kwa tishio lolote la uchumi wa nchi, ikizingatiwa nchi hiyo iko imara kiuchumi Afrika Mashariki.

Serikali ya Kenya iliomba pesa hizo kama njia ya tahadhari, iwapo kutatokea dharura kama vile majanga ya asili au mashambulio kutoka kwa wapiganaji.

Fedha hizo zitakuwepo kwa kipindi cha miezi 12 ijayo.

Wizara ya fedha imeiambia IMF haina nia ya kutumia pesa hizo.

Badala yake itatumika kama kinga dhidi ya “mtikisiko wa kiuchumi”, IMF ilisema.

Chanzo: BBC
Imetafsiriwa na Mwandishi wetu

                                                                                                        

WAPIGANAJI WAWILI WANYONGWA JORDAN

 Sajida al-Rishawi alipewa hukumu ya kifo huko Jordan kwa takriban muongo mmoja 

Jordan imewanyonga wafungwa wawili, akiwemo mpiganaji mmoja wa kike, kufuatia mauaji ya rubani wao mmoja wa kijeshi aliyeuawa na wapiganaji wa Islamic State (IS).

Mwanamke huyo, aliyekuwa amejitolea mhanga lakini hakufanikiwa Sajida al-Rishawi, na mshirika wa al-Qaeda Ziyad Karboli – wote wakiwa raia wa Iraq – walinyongwa alfajiri, maafisa walisema.

Mauji hayo kwa kunyonga yalifanyika saa chache baada ya IS kuweka video ikionyesha rubani Moaz al-Kasasbeh akichomwa moto ilhali yuko hai.

Alikamtwa baada ya kupata ajali wakati wa kupambana na IS huko Syria mwezi Desemba.

Jordan ilikuwa ikifanya jaribio la kumwokoa Lt Kasasbeh ili aachiwe huru kwa kubadilishana naye na Rishawi.

Rishawi alipewa hukumu ya kifo kwa kuhusika na mashambulio katika mji mkuu wa Jordan, Amman, ulioua watu 60 mwaka 2005.

Karboli alitiwa hatiani mwaka 2008 kwa kumwuua raia wa Jordan.

WABUNGE WAKUBALI MTOTO KUPITIA WATU WATATU

 

Wabunge wamepiga kura kuunga mkono utengenezaji wa watoto kwa asidi nasaba kutoka wanawake wawili na mwanamme mmoja, katika tukio la kihistoria.

Uingereza sasa itakuwa nchi ya kwanza kuanzisha sheria kuruhusu utengenezaji watoto kwa kutumia watu watatu.

Katika upigaji kura bungeni, wabunge 382 waliunga mkono huku 128 wakipinga mchakato huo unaozuia maradhi yanayohusisha asidi nasaba zinazopita kwa mama kwenda kwa mtoto.

Wakati wa mjadala, mawaziri walisema muundo huo ni “mwanga mwisho wa tanuri la kiza” kwa familia nyingi.

Kura nyingine inatakiwa kupigwa kwenye bunge la House of Lords. Kama kura ikipitishwa basi mtoto wa aina hiyo atazaliwa mwakani.

Inakadiriwa watoto 150 kutoka wazazi watatu huenda wakazaliwa kila mwaka.

RUBANI WA JORDAN 'ACHOMWA AKIWA HAI'

Jordan imethibitisha kifo cha rubani Moaz al-Kasasbeh baada ya video iliyowekwa mtandaoni na Islamic State (IS) inayodaiwa kumwonyesha akichomwa moto akiwa hai.

Video hiyo inamwonyesha mtu mmoja akiwa amesimama kwenye kizimba huku akiwaka moto.

Maafisa wanahangaika kuthibitisha kama video hiyo ni ya kweli.

Mfalme Abdullah wa Jordan amemsifu Lt Kasasbeh kuwa shujaa, akisema Jordan lazima “isimame imara” wakati huu mgumu.

Rubani huyo alikamatwa baada ya ndege yake kushuka karibu na Raqqa, Syria, mwezi Desemba wakati wa harakati za mapambano dhidi ya IS.

Video iliyowekwa siku ya Jumanne ilisambazwa kwenye mtandao wa kijamii wa Twitter inayojulikana kuwa chanzo cha propaganda za IS.

BOBBI KRISTINA BROWN 'HALI MAHUTUTI'

Whitney Houston pamoja na Kristina Brown mwaka 2011

Bobbi Kristina Brown, binti wa mwimbaji marehemu Whitney Houston, "yuko katika hali mbaya” baada ya kukutwa hana fahamu, familia yake imesema.

Bi Brown, mwenye umri wa miaka 21, alikimbizwa hospitalini siku ya Jumamosi baada ya kukutwa katika hali hiyo ya kupoteza fahamu bafuni nyumbani kwake mjini Atlanta.

Mama yake, aliyekuwa aking’ara duniani kote, alikutwa amefariki dunia Februari 2012, akiwa na umri wa miaka 48, bafuni katika hoteli Los Angeles.

Hospitali haijsema lolote kuhusu hali yake ila familia yake imesema wapo naye.

Taarifa iliyotolewa, na familia ya Bi Brown: "Bobbi Kristina anapambana na amezungukwa na familia yake."

"Tunawaomba mheshimu ombi letu la kutuachia faragha wakati huu mgumu."

Siku ya Jumatatu, polisi walisema waliitwa nyumbani kwake Atlanta siku ya Jumamosi kwa minajil ya mtu “kuzama”.

Afisa mmoja wa polisi aliiambia redio moja kuwa hawakukuta dawa zozote za kulevya nyumbani kwake.

Baba yake Bobbi Kristina ni msanii maarufu wa miondoko ya hip-hop Bobby Brown.

WATOROKA JELA WAKITUMIA MASHUKA, INDIA

 

Zaidi ya wahalifu vijana 90 wametoroka kutoka kizuizini katika jimbo la Uttar Pradesh, kaskazini mwa India, polisi walisema.

Wahalifu hao, wote wakiwa chini ya umri wa miaka 18, walitoa vyuma vilivyopo kwenye dirisha na kufunga mashuka waliounganisha pamoja ambayo walitumia kushuka nayo.

Walitokea nyuma ya jengo mjini Meerut huku polisi wakiwa wamelinda kwa mbele.
Wafungwa thelathini na watano wamekamatwa mpaka sasa, polisi walisema.

Afisa mwanadamizi wa polisi Om Prakash ameliambia shirika la habari la AFP kwamba kutoroka huko kumefanywa  "kwa utaalamu mkubwa hata hamna aliyegutuka".

Kitendo hicho cha kutoroka kiligunduliwa baada ya baadhi ya wafungwa walipokutwa barabarani, wakijaribu kusimamisha magari mapema Jumatatu asubuhi.

Bw Prakash alisema wale ambao bado wamekimbia ni pamoja na wafungwa waliotiwa hatiani kwa uhalifu kama vile mauaji, ubakaji, wizi na ujambazi.

Zaidi ya wahalifu vijana 31,000  wanashikiliwa kwenye vituo maalum India.