150 WAPEWA MIMBA NA WANAFUNZI WENZAO CHUONI

Wanafunzi 150 kati ya 1,000 waliojiunga na masomo katika Chuo Kikuu Kishiriki cha Elimu Dar es Salaam (Duce) mwaka jana wamebainika kuwa na ujauzito waliopewa na wenzao chuoni hapo.

Utafiti wa usawa na jinsia uliofanywa na chuo hicho kati ya Juni na Novemba mwaka jana umebaini kuwa wanafunzi wanaopata ujauzito ni wale wa mwaka wa kwanza.

Hayo yamebainishwa jana na Mratibu wa Masuala ya Jinsia wa chuo hicho, Dk Dativa Shilla katika warsha ya uchaguzi na uhusiano wa kijinsia iliyofanyika chuoni hapo.

Alisema hali hiyo inatokana na kuwapo kwa vitendo vya ukatili, manyanyaso na ubabe unaofanywa na wanachuo wa kiume dhidi ya wale wa kike na hivyo kuwalazimisha kufanya mapenzi bila hiyari yao.

“Kupitia utafiti huu tumeona hakuna usawa wa kijinsia wa kupata elimu baina ya mwanamke na mwanamume kwa sababu mwenye ujauzito hawezi kufanya vizuri katika masomo yake ukilinganisha na mhusika wa kiume,” alisema.

ASAMOAH GYAN KUCHEZA DHIDI YA SENEGAL?

 

Kapteni wa Ghana Asamoah Gyan anaugua “malaria” na huenda asiweze kucheza dhidi ya Senegal siku ya Jumatatu.

Shirikisho la Mpira la Ghana lilisema mshambuliaji huyo alilazwa hospitalini huko Mongomo siku ya Jumamosi jioni na kutolewa Jumapili asubuhi.

Ugonjwa huo “uligunduliwa mapema” na Gyan anaendelea vizuri baada ya kupata matibabu.

Kiongozi wa timu ya Senegal Alain Giresse lazima aamue kuhusu afya ya Sadio Mane, ambaye amekuwa hachezi baada ya kujeruhiwa mguu.

Mchezaji huyo wa Southampton alijumuishwa kwenye timu hiyo licha ya klabu yake kusisitiza kuwa hatokuwa na afya nzuri ya kucheza.

Chanzo: BBC                                                

KISWAHILI NI CHA WASIOJUA KIINGEREZA?

Katika nchi nyingi za Afrika, jamii imejigawa katika jamii ndogondogo ziitwazo makabila.

Kila kabila linakuwa na lugha inayotambulisha jamii ile. Kwa kuwa katika nchi makabila ni mengi na yanaongea lugha tofauti ambazo mara nyingi hata hazisikilizani, nchi huamua kuweka lugha moja rasmi kuwa lugha ya taifa.

Wenzetu katika nchi nyingine waliamua kuchukua lugha ya wale waliowatawala kuwa ndio lugha ya taifa. Hivyo kama walitawaliwa na Waingereza lugha ya taifa inakuwa Kiingereza, kama walitawaliwa na Wafaransa basi lugha ya taifa inakuwa Kifaransa. Tanzania ni nchi moja katika nchi chache sana katika Afrika ambazo zinatumia lugha ambazo siyo lugha za walio watawala. Sisi Tanzania tunatumia Kiswahili kama lugha ya taifa.

Mimi najivunia sana lugha hii, ninatamba mbele za walimwengu kwamba sisi tuna lugha ya Kiswahili inayotuunganisha kama taifa. Pamoja na kwamba sasa Kiswahili kimeenea sehemu nyingine za dunia hii hasa zile za Afrika Mashariki bado mimi naona hiyo ni lugha yetu sisi na wengine wamejifunza kama sisi tunavyojifunza lugha za watu wengine.

Ninaamini wapo wenye fikira kama hizi za kwangu lakini ninahisi pia wapo wanaoona lugha hii haiwahusu. Wengi wa hao ni watu wanaojua Kiingereza ambao wanaona Kiingereza ndiyo utambulisho wa usomi.

Hivyo hata kama Kiswahili kinadidimia hilo sio tatizo kwao kwani hiyo siyo lugha ya watu wenye hadhi; hata kama matumizi ya lugha hiyo ya Kiswahili siyo sahihi, hilo halijalishi kwani inakosewa lugha isiyo ya lazima kwao.

THAILAND KUITAMBUA JINSIA YA TATU?

 

Thailand, hivi karibuni inaweza kuanza kutambua jisnia ya tatu kwa mara ya kwanza kwenye katiba ya nchi hiyo.

"Ni haki ya binadamu kama ulizaliwa mwanamme au mwanamke na unataka kubadili jinsia yako au kuwa na maisha ya jinsia nyingine." Alisema Kamnoon Sittisamarn, msemaji wa kamati ya rasimu ya katiba, inayofanyia kazi rasimu mpya nchini humo.

"Watu wanatakiwa kuwa na uhuru wa kubadili jinsia na wanatakiwa kupata ulinzi sawa kutoka kwenye katiba na sheria na kupewa haki sawa."

Jinsia ya tatu inamaanisha kuwa mtu hatotakiwa kujitambulisha kama mwanamme au mwanamke, na kumpa haki ya kujitambulisha kivyake.

Iwapo itapitishwa , Thailand itajiunga na nchi kadhaa za bara la Asia, zikiwemo India, Pakistan na Nepal, ambazo hivi karibuni zimekubali kutambua jinsia ya tatu.


Chanzo: edition.cnn.com
 

 

MAFURIKO YAUA TAKRIBAN 170 MALAWI

Serikali ya Malawi imesema takriban watu 170 wamefariki dunia kutokana na mafuriko – ongezeko kubwa sana.

Mvua kubwa katika kipindi cha mwezi mmoja uliopita umevurumusha nyumba tele na kusababisha wakazi wengi kuhamia uwanda wa juu, wengine wakivuka mpaka hadi Msumbiji.

Makamu wa rais Saulos Chilima alisema zaidi ya watu 100,000 walihama makazi yao, hasa kusini.
Mapema wiki hii, serikali ilitangaza kuwa theluthi ya nchi hiyo ni eneo la majanga na kuomba msaada.

Mamlaka za Malawi zimekuwa zikitumia helikopta za kijeshi na boti kuwafikia baadhi ya watu waliokwama.

Lakini Bw Chilima alisema shughuli za uokoaji zinakwama kutokana na hali mbaya ya hewa katika siku chache zilizopita na ugumu wa kupata sehemu ya kutua kwa helikopta hizo.

CHARLIE HEBDO: MAGAZETI YA AFRIKA YAOMBA RADHI

Gazeti la The Star lina ushawishi Kenya

Magazeti mawili ya Afrika yameomba radhi kwa kuchapisha ukurasa wa juu wa jarida la  Charlie Hebdo likiwa na kibonzo cha Mtume Muhammad, baada ya wasomaji wa Kiislamu kulalamika.

Gazeti la Kenya The Star na The Citizen la Afrika kusini yamesema yanajuta kwa kuwakosea Waislamu.  

Chombo cha kudhibiti vyombo vya habari Kenya kimemwita shaurini mmiliki wa gazeti la Star baada ya kulishutumu kukiuka sheria ya kuheshimiana.

Nchini Senegal, serikali imepiga marufuku usambazaji wa jarida hilo la Charlie Hebdo.

Gazeti la pili la Kenya, Business Daily, nalo limechapisha ukurasa huo wa mbele wa jarida hilo la Ufaransa.

Katika toleo lake la Alhamis asubuhi, The Star lilisema wasomaji wengi wa Kiislamu wamelalamika juu ya “uzalishaji mdogo” wa ukurasa wa mbele wa Charlie Hebdo siku ya Jumatano.  

Wakiomba radhi, gazeti hilo, la tatu kwa ukubwa Kenya, limesema “linajuta sana kwa kosa na uchungu uliosababishwa na picha hiyo”.

HUDUMA YA AFYA ANGANI YAZINDULIWA KENYA

Kenya imezindua huduma yao ya kwanza ya gari la wagonjwa la angani itakayosaidia kuwahamisha majeshi ya usalama waliojeruhiwa kwenye mapambano.

Rais Uhuru Kenyatta alisema huduma hiyo ni muhimu kuhakikisha wanapata tiba haraka.

Huduma hiyo inatarajiwa kuwapa matumaini zaidi wafanyakazi wa masuala ya usalama wanaokabiliwa na vitisho vya mara kwa mara, mwandishi wa BBC alisema.

Baadhi ya wanajeshi na polisi wametoka damu mpaka kufa au kufa kutokana na ukosefu wa maji maeneo ya vijijini nchini Kenya kwasababu ya muda mrefu unaotumika kuwafikisha hospitalini.

Serikali ya nchi hiyo sasa imefanya makubaliano na Shirika la Msalaba Mwekundu, Red Cross na kampuni binafsi ya madaktari wasio na mipaka ya AMREF kutoa huduma za helikopta na magari wanapopata tu simu za kuhitaji huduma hiyo haraka.

 Huduma hiyo pia itatolewa kwa wafanyakazi wa serikali, hasa wale wanaofanya kazi kwenye nyanja ya usalama vijijini na walio na vifaa vichache vya kutolea matibabu.

Kundi la Kisomali la al-Shabab limeongeza mashambulio nchini Kenya katika miaka ya hivi karibuni.