UCHAGUZI WA MWEZI HUU NIGERIA WAAHIRISHWA

Mapema Jumamosi, waandamanaji wengi wametoa wito wa uchaguzi kuendelea kama ilivyopangwa

Upinzani wa Nigeria umesema hatua ya kuahirisha uchaguzi wa rais wa Februari 14 kwa wiki sita “una athari kubwa kwa demokrasia”.

Tume ya uchaguzi imesema imesogeza tarehe ya upigaji kura kwasababu majeshi yaliyotakiwa kufanya ulinzi kwenye vituo vya kupigia kura yamesambazwa kupambana na Boko Haram

Kuahirishwa kwa uchaguzi huo kumeifurahisha chama tawala, lakini Marekani imesema “imesikitishwa”

Nigeria imekuwa ikipambana na wapiganaji wa Boko Haram kaskazini-mashariki mwa nchi hiyo.

Maelfu ya watu wamekufa kutokana na mapigano ya wapiganaji hao katika kipindi cha miaka sita iliyopita.

Boko Haram pia imeanza kushambulia majirani wa Nigeria: siku ya Jumapili, kwa mara ya pili katika siku tatu, wapiganaji hao wameshambulia mji wa Diffa mpakani mwa Niger.

Takriban mtu mmoja alifariki dunia kwenye mlipuko katika soko la mji huo, huku baadhi ya walioshuhudia wakisema mtu aliyejitoa mhanga ndiye kahusika.

BABA WA KIM KARDASHIAN APATA AJALI

Polisi Los Angeles wamethibitisha nyota wa kipindi cha TV Bruce Jenner amehusika kwenye ajali iliyosababisha kifo cha mwanamke mmoja.

Jenner mwenyewe hakujeruhiwa, lakini wengine saba walipelekwa hospitalini.

Mwanamke mwenye umri wa miaka ya 70 alitangazwa kufariki dunia kwenye eneo la tukio huko Malibu.

Msemaji wa polisi wa LA alisema hapakuwa na dalili zozote kuwa Jenner, baba wa kambo wa Kim Kardashian, akifuatiliwa na mapaparazzi.

Msaidizi wa Jenner, Alan Nierob, alisema baba huyo mwenye umri wa miaka 65 hakuumia.

Sajeni Philip Brooks, kutoka iadara ya polisi ya Los Angeles, alisema gari aina ya Cadillac Escalade ya Bruce Jenner iliigonga kwa nyuma gari aina ya Lexus sedan, ambayo nayo ilikuwa imeigonga upande wa nyuma wa gari aina ya Toyota Prius.

Lexus hiyo ikaingia kwenye foleni iliyopo mstari mwengine na kugongana na gari jeusi aina ya Hummer.

Polisi walisema Jenner alishirikiana vyema na wachunguzi katika eneo la tukio na hakukutwa na pombe mwilini alipopimwa. Pia alipimwa damu.

Jenner alishinda dhahabu kwenye mashindano ya Olimpiki mwaka 1976 ya ‘decathlon’ lakini anajulikana zaidi kwenye kipindi maarufu cha TV Keeping Up With The Kardashians.

'KINYESI' CHA BINTIYE KUMWONGEZEA UZITO

Mwanamke mmoja ameongezeka uzito kwa kiwango kikubwa baada ya kuhamishiwa bakteria kutoka kwenye kinyesi ‘stool transplant’ cha binti yake, madaktari walisema.

Ni utaratibu halali wa kitabibu kuhamishia bakteria wazuri kwenye utumbo ulioathirika, lakini madaktari wa Marekani wanahisi huenda imeathiri eneo la kiuno.

Ghafla aliongezeka kwa kilo 16 na sasahivi anachukuliwa kama mtu mwenye maradhi ya unene kupindukia.

Mtaalamu mmoja wa Uingereza alisema uhusiano baina ya bakteria wa tumboni na unene kupindukia bado hauko wazi.

Kuhamishiwa bacteria ‘wazuri’ wa kinyesi kwenye kiungo cha mtu mwengine hasa kwenye utumbo ‘faecal microbiota transplant’ – ambao baadhi huita "transpoosion" – kumeungwa mkono rasmi na huduma za kutoa afya za Uingereza mwaka jana.

Tiba mpya

ALI KIBA AZUNGUMZIA BIFU LAKE NA DIAMOND

Hatimaye staa wa Bongofleva Ali Kiba amekiri kuwa yuko katika bifu na mwanamuziki mwenzie Diamond Platnumz kwa zaidi ya miaka mitatu sasa.

Kauli hiyo ya Ali Kiba inapingana na ile ya hivi karibuni iliyowahi kutolewa na Mwenyekiti wa Kamati za bunge ya Hesabu za Serikali (PAC), Zitto Kabwe alisisitiza kuwa wanamuziki hao hawana tofauti zozote na kwamba ni watu tu ndio wanakuza suala hilo.

Hata hivyo, juzi Ali Kiba aliliambia gazeti hili kuwa ni kweli kuna ugomvi baina yao, huku akisisitiza kwamba tofauti yao ilianza mwaka 2012. Wakati Ali Kiba akifunguka kuhusu bifu hilo hali imekuwa tofauti kwa Diamond ambapo amekaririwa mara kadhaa kuwa hana tofauti yeyote na mwanamuzi huyo ambaye wanatoka mkoa mmoja wa Kigoma na kuunganisha Kundi la Kigoma All Stars. Akizungumza wakati akijibu maswali mbalimbali katika mahojiano maalumu, mwanamuziki huyo pia alielezea mambo mengi kuhusu muziki wake na hii ni sehemu ya mahojiano hayo;

Swali: Nini chanzo cha bifu lako na Diamond?

Ali Kiba: Hakuna kiini kwa sababu nadhani hayo mimi aaah.…Kiukweli haya tuliyamalizaga muda mrefu …Labda watu wahisi kwamba kipindi kile alichonifuta katika wimbo wake (alisema bila kufafanua jina la wimbo) na yeye alivyosema kwamba nimemfuta katika wimbo wangu ‘Single Boy’, mimi sijawahi kurekodi na Diamond katika wimbo wangu hata mmoja na huo niliimba na Lady Jaydee.

Yeye ndiye aliyesema kwamba nilimfuta katika wimbo ule, ila ukweli ni kwamba hatukuwahi kuingia pamoja studio, nilimshauri tufanye wimbo mwingine lakini siyo ule kwa sababu nimeshaimba na Lady Jay Dee.

Swali: Umeshawahi kuwa karibu na Diamond?

MBUNGE MUCHAI AUAWA KENYA

 

Mbunge wa Kenya na wasaidizi wake watatu wamepigwa risasi na kufa katika mji mkuu Nairobi, kwa kile ambacho polisi walielezea kama shambulio “lililopangwa vyema”.

George Muchai alikuwa akielekea nyumbani mjini Nairobi, ambapo ghafla gari lake likavamiwa na gari nyingine.

Bw Muchai, walinzi wawili na dereva wake walikufa hapo hapo.

Lengo la shambulio hilo, lililolaaniwa na rais pamoja na kiongozi wa upinzani, bado halijajulikana.

Polisi walisema washambuliaji hao waliiba mkoba na bunduki za walinzi.

Bw Muchai alikuwa mbunge kutoka chama tawala cha muungano Jubilee na alichaguliwa kwa mara ya kwanza miaka miwili iliyopita.

Rais wa Kenya Uhuru Kenyatta alisema alishtushwa na shambulio hilo, akimwita Bw Muchai “mtumishi wa kweli wa watu”.

Kiongozi wa upinzani Raila Odinga naye pia amelaani mauaji hayo, lakini amesema ni sehemu pana zaidi ya ukosefu wa usalama Kenya.

MWANAMKE AKAMATWA LONDON KWA 'UKEKETAJI'

Mwanamke mmoja amekamatwa uwanja wa ndege wa Heathrow kwa kosa la njama ya kufanya ukeketaji.

Mwanamke huyo mwenye umri wa miaka 42 alikuwa ndio kwanza ana mpango wa kupanda ndege iliyokuwa ikielekea Ghana kupitia Amsterdam alipokamatwa na maafisa waliokuwa wakifanya harakati za kuelimisha watu kuhusu ukeketaji.

Raia huyo wa Uingereza aliyezaliwa Zimbabwe, alipelekwa kituo cha polisi magharibi mwa London.

Binti mwenye umri wa miaka minane aliyefuatana na mwanamke huyo alipelekwa ustawi wa jamii.

Polisi walifanya harakati hizo uwanja wa ndege kutoa elimu sambamba na siku ya kimataifa ya kupinga ukeketaji.

BENKI YAFUNGWA MAREKANI KUHOFIA AL-SHABAB

Benki moja inayoshughulika na kusafirisha pesa kati ya Wasomali waishio Marekani kwenda kwa familia zao Afrika Mashariki inatarajiwa kufunga huduma zake kukiwa na wasiwasi kuwa fedha hizo hutumwa kwa wapiganaji.

Merchants Bank of California hushughulikia 80% ya huduma hizo kutoka Marekani, zenye thamani ya takriban dola milioni 200 kwa mwaka.

Lakini benki hiyo imesema haitoweza kuendelea kutoa huduma hiyo kutokana na utaratibu mpya ulioanzishwa wa ulanguzi wa fedha.

Mbunge mmoja wa Marekani aliielezea uamuzi huo kuwa na "athari kubwa”.

Wasimamizi wana wasiwasi kuwa baadhi ya fedha hizo zinazotumwa huenda zikaishia mikononi mwa wapiganaji wa kundi la al-Shabab.

Abdullahi Ismail, raia wa Marekani aliyezaliwa Somalia anayeishi California, aliiambia BBC kuwa jumuiya ya Wasomali imeshtushwa na uamuzi huo.