'KAMANDA' WA LRA AJISALIMISHA CAR

Ongwen, picha ya mwaka 2008, inasemekana alichukuliwa kuwa jeshi la LRA tangu akiwa mtoto

Mtu mmoja anayedai kuwa kamanda mwandamizi katika kundi kubwa la waasi la Lord's Resistance Army (LRA) ametiwa kizuizini na jeshi la Marekani.

Mtu huyo, aliyejitambulisha kama Dominic Ongwen,alisalimu amri Jamhuri ya Afrika ya Kati, CAR, wizara ya mambo ya nje ya Marekani ilisema.

Ongwen anasakwa na Mahakama ya Uhalifu wa Kivita akishutumiwa kuhusika na uhalifu wa kivita na uhalifu dhidi ya binadamu.

Anadhaniwa na baadhi ya watu kuwa naibu kamanda wa kiongozi wa LRA Joseph Kony.

Msemaji wa wizara ya mambo ya nje ya Marekani Jen Psaki alisema mtu huyo alidai kuwa ameasi kundi hilo la LRA.
Joseph Kony, kiongozi wa LRA wamekuwa vitani nchini Uganda na eneo zima kwa zaidi ya miongo miwili.

Chanzo: BBC
Imetafsiriwa na mwandishi wetu

UJAUZITO: MBINU YA KUPITISHA DAWA ZA KULEVYA

Baadhi ya wanawake wa Kitanzania waliofungwa katika magereza ya China na Hong Kong, walishika ujauzito kama moja ya mbinu ya kupitisha dawa za kulevya bila kugundulika kwenye viwanja vya ndege na mipaka mingine ya kimataifa. Mwananchi limebaini.

Watanzania wanne walio katika magereza ya China na Hong Kong walijifungua watoto kwa nyakati tofauti wakiwa wanatumikia vifungo na wamekiri kuwa walibeba ujauzito kama mbinu ya kupitisha dawa hizo bila kukaguliwa.

Watoto wanaozaliwa magereza baada ya kufikisha mwaka mmoja hupelekwa katika vituo vya watoto yatima na kusomeshwa na Serikali ya China hadi pale wazazi wao watakapomaliza adhabu.

Imebainika kuwa watoto wawili wapo katika vituo hivyo, mmoja tayari yupo Tanzania baada ya bibi yake kumrejesha na mwingine bado yupo gerezani na mama yake.

Wanawake hao ambao wote wana umri wa kati ya miaka 20 na 30 walieleza masikitiko yao jinsi ambavyo wafanyabiashara wakubwa wa dawa za kulevya wanavyowarubuni ili kubeba dawa hizo kwa ahadi za kuwapa fedha nyingi.

NEPAL YAANZISHA MABASI YA WANAWAKE TU

 

Huduma  ya basi ya wanawake pekee imeanzishwa kwenye mji mkuu wa Nepal, Kathmandu kupunguza kudhalilishwa kijinsia katika mji wenye njia zilizojaa watu wengi.

Mwenyekiti wa kampuni hiyo alisema nia ni kufanya wanawake wajisikie raha na salama.

Magari manne yenye viti 17 kila mmoja yatafanya safari zake kwenye barabara kuu muda wa shughuli nyingi.

Takriban robo ya mabinti wamedhalilishwa kijinsia katika usafiri wa umma, kulingana na utafiti wa Benki ya Dunia ya mwaka 2013.

Lengo mwishowe ni wafanyakazi wote wa mabasi hayo wawe wanawake

Mabasi yote Kathmandu hutakiwa kuachia idadi kadhaa ya viti kwa „wanawake tu” kisheria, lakini wakosoaji wanasema sheria hiyo haitekelezwi.

Kwa sasa kuna kondakata mmoja tu mwanamke katika kampuni hiyo lakini Bw Bharat Nepal, mkuu wa jumuiya ya usafiri alisema nia mwisho ni wanawake tu ndio waweze kuiendesha kampuni hiyo.

KAMPUNI YA POMBE KUTUMIA PICHA YA GANDHI

 

Kampuni moja ya pombe ya Marekani imeomba radhi kwa kutumia picha ya shujaa wa uhuru wa India Mahatma Gandhi kwenye maokpo yake ya bia, taarifa zinasema.

Hatua hiyo ya kampuni ya New England imefanyika baada ya kesi kufunguliwa kwenye mahakama ya India ikisema hatua hiyo “imemdhalilisha” kiongozi huyo.

Gandhi aliongoza mapambano bila vurugu dhidi ya utawala wa Kiingereza nchini India.

Aliuawa Januari,1948, miezi kadhaa baada ya India kupata uhuru.

Pombe hiyo yenye picha ya kiongozi huyo inaitwa Gandhi-Bot.

Katika mtandao wake kampuni hiyo inasema bia hiyo ni “ni namna ya kujitakasa na kusaka ukweli na mapenzi".

Wakili mmoja amefungua kesi mjini Hyderabad, kusini mwa India, akidai kutumia picha ya Ghandi kwenye makopo ya pombe ni “la kulaaniwa” na la kuadhibiwa kutokana na sheria za India.

Kampuni hiyo ilisema inaomba radhi kwa yeyote waliyemwuudhi. Na hakuna dalili zozote za kampuni hiyo kuondosha picha hiyo.

Matt Westfall, mkuu wa kampuni hiyo alisema "wajukuu wa Ghandi wameiona picha hiyo na wameonyesha kuvutiwa nayo” Haikuwa wazi ni ndugu gani kampuni hiyo ilikuwa ikiwazungumzia hasa.

Alisema ana matumaini bidhaa hiyo itawavutia watu “kujifunza zaidi kuhusu Mahatma Gandhi na mbinu zake za kutotumia vurugu. Wahindi wengi hapa Marekani wameridhishwa na hatua hiyo.

Chanzo: BBC
Imetafsiriwa na mwandishi wetu

MSHUKIWA WA MAUAJI AHISIWA KUWA TANZANIA

   

Almahri anasakwa kwa kuhusika na kifo cha Nadine

Msako wa kimataifa unafanyika baada ya mwanamke mmoja kukutwa amekufa kwenye chumba cha hoteli.

Mwili wa Nadine Aburas, mwenye umri wa miaka 28, ulikutwa na wafanyakazi katika hoteli ya Future Inn hotel huko Cardiff siku ya mwaka mpya.

Polisi wa South Wales walisema wanaichukulia kesi hiyo kuwa ya mauaji na wanataka kumsaka mshukiwa Sammy Almahri, raia wa Marekani kutoka mjini New York.

Almahri, mwenye umri wa miaka 44, ambaye ana majeraha yanayoonekana usoni, alikuwa na “urafiki” na Bi Aburas na inaaminiwa kwamba sasa yupo Tanzania, jeshi hilo la polisi limesema.

Mshukiwa huyo aliingia katika hoteli hiyo ya Future Inn hotel huko Cardiff Bay, Desemba 30 kabla Bi Aburas kuwasili kwenye saa tatu usiku.

Halafu aliondoka kwenye hoteli hiyo kwenye saa 9 alfajir siku ya Mwaka mpya na kusafiri kwa ndege kutoka uwanja wa ndege wa Heathrow, Uingereza na kuelekea Bahrain saa nne unusu asubuhi.

Mpelelezi wa polisi Paul Hurley alisema Almahri anachukuliwa kuwa mtu "hatari" na "mwenye mengi" alipozungumza na umma kusaidia kumpata.

Alisema: "Hoteli ilikuwa imeshughulika na watu waliokuwa wakisherehekea Krismasi na Mwaka Mpya. Watakuwepo watu waliowaona pamoja, au peke yao, na ninawasihi wajitokeze.

"Wakati bado hatujakamata mtu yeyote, tuna maafisa wanaojaribu kumsaka Sammy Almahri, ambapo sasa tunaamini yupo nchini Tanzania.

"Tumekuwa tukifanya kazi kwa karibu na wafanyakazi wenzetu wa Marekani na maafisa polisi wa Tanzania.

Kutokana na uchunguzi wetu tumegundua  Almahri ni mtu anayejiweza sana na uwezo wa kupata fedha nyingi, ambayo inaweza kumsaidia kukwepa mkono wa sheria.

Uchunguzi wa mwili wa marehemu umekamilika lakini sababu ya kifo chake bado hakijathibitishwa.

Familia ya Bi Aburas imetoa rambirambi kwake kwa kusema "mzuri, mchangamfu, wa kipekee na mwenye kipaji".

Katika taarifa walisema: "Alikuwa anapenda sana kusaidia watu na kila mtu alimpenda. Ameacha pengo kubwa kwenye familia yetu na kila mmoja anampenda. Familia imeomba waachwe waomboleze kimya kimya.”

Chanzo: www.uk.news.yahoo.com
Imetafsiriwa na Mwandishi wetu

MSHTUKO: KIFO CHA MTOTO WA RAILA ODINGA

Fidel Odinga, mtoto mkubwa wa kiume wa kiongozi wa chama cha Cord cha Kenya, Raila Odinga, alikutwa siku ya Jumapili asubuhi nyumbani kwake Windy Ridge, Karen baada ya kurejea  usiku alipotoka na rafiki zake.

Mwili wa mtoto huyo wa Raila ulikutwa kitandani. Polisi walisema mpaka sasa haijajulikana chanzo cha kifo chake.

Aliyezaliwa mwaka 1973, marehemu Fidel alimwoa mwanamke kutoa Eritrea, Getachew Bekele,ambaye amezaa naye mtoto mmoja.

Fidel alikuwa mtoto mkubwa katika familia ya watoto wanne Rosemary, Raila Junior na Winnie.

Taarifa ya kifo chake tu kilipojulikana, ujumbe wa kutoa pole ulimiminika kwenye mitandao ya kijamii.

Kurasa za Facebook zikafunguliwa na kusababisha wafuasi wengi kuzifuata saa chache baada ya kifo chake.

Chanzo: nation.co.ke
Imetafsiriwa na mwandishi wetu

SELENA GOMEZ AZUA KITAHANANI MSIKITINI

Selena Gomez alizua kizaazaa wiki hii baada ya kuonyesha kiwiko chake alipotembelea msikiti – hatahivyo ameitoa picha hiyo baada ya kujikuta akikosolewa na wengi.

Alipigwa picha hiyo alipozuru msikiti mkubwa wa Sheikh Zayed, na alijistiri mwili mzima kwa ajili ya ziara hiyo.

Lakini ilipokuja wakati wa kupiga picha, Selena aliachia kiwiko na sehemu ya mguu hadharani.

Sheria za msikiti huo ziko wazi kuwa sketi zote lazima zifunike mpaka kiwiko, na unakataza ‘tabia zozote za kukaribiana ‘.

Mtu mmoja aliandika: "Kama nia yao ilikuwa kujifunza Uislamu wasingesimama kama wamesimama nje ya bustani.



"Nampenda Selena Gomez lakini kufanya jambo kama hili kunanifanya nisiwe mshabiki wake tena."

Mwengine aliongeza: "Si chuki. Lakini angetakiwa kuwa makini zaidi kuhusu misikiti. Ile sehemu ni takatifu na eneo la kuswali. Si sehemu ya kustarehe na kuchukua picha.

Lakini wapo wengine waliomtetea nyota huyo, mmoja akiandika: "Sio kwamba wamewavunjia heshima. Maelfu ya watu hutembelea msikiti huo wa Sheikh Zayed huko Abu Dhabi.

"Ni sehemu ya ibada, ndio najua, lakini Mungu hajawahi kukataza watu wa dini nyingine kuingia msikitini. Kwahiyo tafadhali heshimu kuwa walitaka kujua zaidi kuhusu Uislamu na uzuri wa dini hiyo."

Selena Gomez na muigizaji na mwimbaji kutoka Marekani ambaye pia aliwahi kuwa mpenzi wa muimbaji maarufu Justin Bieber.


Chanzo: www.mirror.co.uk                               
Imetafsiriwa na mwandishi wetu

KIFUNGO KWA KUMDHALILISHA RAIS KENYATTA

Okengo alikubali kosa la kumdhalilisha Rais Kenyatta

Mwanafunzi wa mwaka wa nne Chuo Kikuu Kenya amehukumiwa mwaka mmoja jela kwa kumdhalilisha Rais Uhuru Kenyatta kwenye mtandao wa kijamii.

Alan Wadi Okengo, mwenye umri wa miaka 25, ambaye anajulikana pia kwa jina la lieutenant Wadi, lazima alipe faini ya  $2,200, au atumikie kifungo cha mwaka mwengine wa pili.

Ametiwa hatiani pia kwa kauli za chuki, baada ya kusema watu kutoka kabila la Kikuyu ambalo ndilo alilotoka rais huyo watengwe katika baadhi ya sehemu nchini humo.

Blogger maarufu alifunguliwa mashtaka hivi karibuni baada ya kumwita Bw Kenyatta "adolescent president".

Kenya ina wafuasi wengi kwenye mitandao ya kijamii na mwandishi wa BBC nchini humo alisema kesi hiyo imezua mjadala mzito wa kipi kinaruhusiwa kwenye mitandao hiyo.

Mwandishi huyo alisema watu wengi wanahisi Okenga alivuka mipaka, kwa kuwa kauli zake zilikuwa na chuki binafsi na hazikutakiwa kuchapishwa.

Okenga alikiri makosa yote mawili, kauli za chuki na kumdhalilisha mkuu wa nchi.

Gazeti la Daily Nation kupitia mtandao wao limeripoti kuwa alikamatwa akiwa anajaribu kukimbia nchini humo.

UKIPUNGUA, 'MINYAMA UZEMBE' HUENDA WAPI?

Kuwa na mwili wenye unene wa kupindukia ni tofauti na kuwa na uzito mkubwa kuliko kawaida ingawa watu wengi huchanganya mambo haya mawili na kufikiri kuwa ni jambo moja.

Unene wa kupindukia unatokana na kuwa na mafuta mengi mwilini ambayo yanasababisha mtu kuwa na nyama nyingi ambazo wengine huziita “minyama uzembe” na kitambi.

Lakini uzito mkubwa wa mwili unaweza kutokea pale mtu anapokuwa na misuli mikubwa, mifupa mikubwa, maji mengi mwilini pamoja na mafuta. Baadhi ya magonjwa na matumizi ya dawa pia yanaweza kuchagia mtu kuwa na uzito mkubwa.

Watu wenye tatizo la tezi shingo linalofanya kazi zake chini ya kiwango wanaweza kukabiliwa na tatizo hili. Matumizi ya dawa kama vile baadhi ya vidonge vya uzazi wa mpango na dawa za magonjwa ya akili, pia yanaweza kusababisha tatizo la mwili kuwa na uzito mkubwa.

Wanasayansi wa afya wamekuwa wakieleza kuwa kuna uhusiano mkubwa na wa karibu sana kati ya unene wa kupindukia na magonjwa ya moyo, kiharusi, kupanda kwa shinikizo la damu, saratani za aina mbalimbali, kisukari, kukoroma wakati wa usingizi, maumivu ya mgongo na uvimbe wa maungio yaani baridi yabisi. 

Kutokana na kupendelea kuwa na umbo la kuvutia na sababu za kiafya, watu wengi hulazimika kupunguza unene na uzito wa miili yao.

Lakini maswali ya msingi ambayo watu wengi wamekuwa wakijiuliza kuhusu kupungua kwa unene wa mwili ni pamoja na njia ipi iliyo bora ya kupunguza uzito au unene?